Մինչև 1902 թվականը եկեղեցու տեղում եղել է մատուռ: Գյուղի բնակչությունն այնտեղ է կատարել կրոնական ծիսակատարությունները, բնակչության մի մասն այնտեղ է սովորել գրել, կարդալ և ստացել կրոնական կրթություն: 1902 թվականին արագվացիներն սկսել են կառուցել նոր եկեղեցի, անփոխհատույց օգնություն են ցուցաբերում շրջանի բնակչության մեծամասնությունը: Եկեղեցին կառուցող վարպետը եղել է ղարսեցի Գրիգորը: Գումարը չհերիքելու պատճառով նա եկեղեցու մեծ գմբեթը քարի փոխարեն կառուցել է փայտից: Եկեղեցու կառուցումն ավարտվում է 1909 թվականին : Օծումը տեղի է ունեցել նույն թվին: Քահանան եղել է Կարապետ տեր հայր Ռայիսյանը: Սովետական իշխանության տարիներին դադարում է գործելուց, իսկ 1939 թվականից վերածվում է կոլտնտեսության պահեստի: